Taman Tinan Kinanak,

Tabi idi Sembayang

Tabi idi Sembayang

Ubur, Rayeh idih dita’ uen ngelubed kuan Allah luk nemudut tana’ luk nau tau ngiti bang ngadan Tuhan Yesus Kristus.

Tepun tepun tau pengeh neneped bawang tau kampung Long Tanid 40-60lak luk nepelaba. Ngadan; Ganang Liaw, Ukab Liaw, Buayeh Tadem, Sinawat Tadem, Baru Liun, Acang Balang, Sigar Lalung, Riong Lalung, Berauk Taie, Pur Tuie, Basar Paru, Tebari Balang, Rugu Batun, Taie Batun, Musa Kapung, Pengiran Kapung, Balang Sigar, Lakung Achang, Pelipus Sinawat, Baru Sigar, sebabpat ratnan generasi luk pun-pun, lun luk neh neped bawang tau Long Tanid.

Bele-bele, dat niat tau mula’ rat arang deh inih pengeh nuli ame’ matun Tuhan. tuda burur mo’ luk ketecan nekini peh. Iamo’ mawang niat, amung deh inih pengeh nenginul mula’ anak luk mileh. Masi’ iyap deh, iamo mula’ rat arang anak inul deh medita sikulah ideh inan kekemen luk do’. Inan ame kuh lawyer, keraja perita, guru, polis, nurse, pertanian, pendaftaran, imegrisen, manager, mandur, pendeta, gembala idi ame kuh tukang-tukang luk mebala.

Kiuk lak lun Long Tanid ame mula’. Generasi setecu neh luk masih mangud kiuk ame’ mula’ iyap iamo’ masi luk mileh bang sikula. Meku uih mala yenih, na anak bawang tau, luk neremuat lulusan rat Universiti te’ sepengeh generasi luk atun. Abud dita STPM mo. Ngerawe tau do’ do’, yapeh ke’ laya tau sebagai taman tinan.

Taman Tinan Kinanak,

Sains idi Teknologi

Sains idi Teknologi

Kudeng tau ngerawe idih nier kiuk ulun tanah. Ulun tana’ kiuk ame’ moden. Tau semuet bang generasi sains idi teknologi, mula’ pakai komputer. Contoh luk mesanang; mon tepun tau ngapar pakai kuyu’ talun, iamo nekini tau pakai kuyu taga, mon nalan kukud tau ame lawas nekini, inan kerita. Mon apo rumah pakai don kinangan nekini pakai zink.

Inih ngadan neh tau misu maya ayu kemodenan tana. Ara tu peh tau ku amung inih, ayu’ ulun bang tana’ inih memaksa netau misu, jadi penting inul tau perlu inan ileh pale tau na mele ruen nalok idih ngace ngaceku tau na inan ileh.

luk pun-pun pelaba penting, tau mada’ anak-anak tau pele metot inan Tuhan. Didikan agama, kekeluargaan idi bada’ bala Tuhan pelaba penting.

Sembayang ngaperuan anid kua’ anak anak tau bang kareb ideh ukang necan tatek ruma’ ame sikula idi ame kerja. Na Tuhan na ilung idih na ulek neh. Inan rayeh rapang bang niat kuh kudang inul tau anak Long Tanid na inan Ileh, Anu, Repet idi Awa bang ulun deh.

Ngerawe do’ do’. Kudang apeh ke’ tau miek inan daya saing bang zaman sains dan teknologi kudeng tau male saso kuh ulun tana’ inih?. kudang apeh tau miek tudo mapad beneh idi tuped mapad dita dengan pupu beken kudang tau na inan ileh idi kepakaran luk medita.

Ngerawe tau peritateng mate YB Dr Sakai , Pian neh: “Aceh tetek rumah aceh Graduan Universiti”. Kudang tau masi’ na usin menul anak tau me sikula luk medita, perita nekini melalui tuda-tuda bank miek mere usin ruen ngabit atun idih anak ineh miek mayar abit ineh sepengeh ideh inan kerja muci.

sebaken ratnan ineh do tau nimun nau denug sesut-sesut. ‘Sikit-sikit lama-lama jadi bukit’. Metu mulun bang tana’ inih, agan tu tu pana’ tau inan ileh idi tau pengeh neh sikula medita, ineh pana’ na miek menjamin netau miek belen ame kuh lun do.

Mula’ peluang beken te’, ieh ineh peluang bang seni, sukan, agama idi cabang luk baken te’. Kuan anak tau luk na ngalap keputusan luk do bang sikula’. Miek petecu ngalap kursus. Contoh; kursus lesen Usahawan, kontraktor (lesen F) vokasional, pusat giat mara, CIDB, kursus nerut kain, komputer, kursus dai jabatan pertanian idi mula’ peluang beken. Luk penting; Inan usaha, Inan dalan.

Taman Tinan Kinanak,

Yenih uih pian amung tau peruyung “Nebpu Dalan” kuan generasi luk mangud inih. Generasi luk latin ame kuh lun luk nguyut netau bang sekereb muci. Pele ideh inan ‘Guide’ bang matun cita-cita / Misi / Visi ulun deh.

Aleg tau ngeremen ileh / bada’ kuan deh luk mangud. Mere motivasi galakan pele anak-anak tau lutep nekap ileh bang sikula idih sepengeh remuet ame nekap kerja. Tau lutep nguit nedeh bang sembayang mutuh pele Tuhan ngedangan.

Metu! amung inih ngalap kereb luk mio inan tau ngeranih hasil neh. Iamo usaha tau luk na melawa’ ineh miek ngecing peruan luk do meruked kuan pupu inul tau lun Long Tanid. Idih Lun Bawang miek tengadan, Idih pupuh inul anak Bawang tau lun Long Tanid miek buren tebeco kedangan.

Tabi idi Sembayang.

BALAN BERAUK

http://www.littleborneo.webs.com

Advertisements
Komen-komen
  1. Aaron Chelliah berkata:

    Do’ taga bala’ muh balan. Ui miak nier amung luk iko nengayud inih acingneh rat bang niat muh luk tu-tu inan mawa’ kuan pupu muh Lun Bawang.
    Syabas, idi tecu ngelawan kuan pupu tau.
    Tuhan ngeperuan.

    Kinanak muh,
    Arun

    • Balan Berauk berkata:

      Kinanak Arun,

      Na binawehkuh luk meluun do miek beren kuh kuan pupuh kuh Lun Bawang, ngecehkuh ui pana’ lun masi’. Iamo’ Bada’ idi terawe kuh miek ruen kuh ngayud yenih idi inan rapet miek ngukab terawe kuan ide ide lun luk maca’, selaba’ tau mulun luun tana’ luk selinggageh inih.

      Tabi idi Sembayang.

      Balan Berauk

  2. Saya begitu tergerak setelah membaca apa yang anda tuliskan di sini….satu2nya bagaimana kita dapat membangunkan bangsa kita Lun Bawang agar kedepan nanti…kita tidak berkekurangan…..dalam apa hal sekali pun….asal kita mau berubah..berusaha….seperti kata tau Lun Bawang…inan geregan …..inan dalan…..terima kasih….

Tinggalkan Jawapan

Masukkan butiran anda dibawah atau klik ikon untuk log masuk akaun:

WordPress.com Logo

Anda sedang menulis komen melalui akaun WordPress.com anda. Log Out / Tukar )

Twitter picture

Anda sedang menulis komen melalui akaun Twitter anda. Log Out / Tukar )

Facebook photo

Anda sedang menulis komen melalui akaun Facebook anda. Log Out / Tukar )

Google+ photo

Anda sedang menulis komen melalui akaun Google+ anda. Log Out / Tukar )

Connecting to %s