IDEY UI IDI IKO BANG LAK 2011?

Posted: 6 November 2011 in Life, Uncategorized
Tag:, , , , , , , , , , , , , , , ,
Mawang Niat

Mawang Niat

Aco kiuk aco, bulan mecing, pelibal lak! sebulan beruh, bulan 12 peh. Lak 2011 male mabud. Ngerawe lemubed ulun bang ruked lak 2011 ini, Serabpu megai nai inan nupi idi pian luk do mo’ miek mangun bang ulun nai bang anid aco, iamo’ kekiped neh… amung neh na ulek neh! Gawa’ lusi! tawan ulun…

Kareb hal luk kudeng inih mangun bang ulun nai, niat nai pelaba urat, museh, kiung tekademut idi na inan awang. Terawe meraruh akan rudap nai na tatu. Amung na ulek neh.

Serabpu te’ bang ulun, bang aceh kareb… anun luk na nai ngerawe miek mangun, macing kareb neh, idi danak danak mecing bang ulun nai. Idi nai nginawaa tu tu. Na perlu mutuh, keraja idi inan usaha luk mebura’, amung miek mangun idi nalan dengan do. Niat penu’ kuh awang peh. Rimud, ruruh mo’ luk pedingaren libut nai. Inih luk buri tau PERUAN idi KATU Allah di lek?

Taman tinan kinanak, Inih cerita ulun!, ‘rule of life’. Serabpu inan, serabpu na. Serabpu mesanang, serabpu mesusa’. Amung inan kareb neh! Inan kareb nibu idi inan kareb ngeranih.

Mulun bang tana mula’ tutun. Kareb nai nier libut nai, niat nimun melili. Melili pian kerita’ rayeh, ruma’ rayeh idi usin luk mula’ bang Bank!. Nimun nai ngetaduk keraja kuh ngerada’ binaweh dih peh. Sanggup nalan mado nacan awan anak. Sanggup nalan nacan bawang, mepatad rat ni tamam didueh tinam, kinanak luk inan nai mawa. Amung ngacehkuh pian binaweh luk mula’. Iamo’ macing aceh kareb… ayu’ ayu neh, amung na ulek neh! Terawe nimun na mesanang. Anun luk bire Allah bang ulun nai siren negatif peh. Do ulun dih peh sen… iamo’ niat na inan awang! Ku ngudeh inih miek mangun? Lemubed kinanak! Ngerawe positif! Positif! positif!

Bang tana’ inih, inan sebabpat lemulun luk metueh keraja iamo’ mado na ngerawe Tuhan! Setecu neh te’, Inan sebabpat lemulun pelaba anu idi merapet inan Tuhan iamo’ mekupe keraja.

Terawe kuh, Ulun luk metu… mesti ‘balance atau seimbang’. Inan ‘Anu, Rapet idi Awa’ inan Tuhan idi mesti ‘kukud ukang’ remuat ame’ keraja te!

Sebabpat lemulun luk metueh keraja na metot inan Tuhan, kareb ideh sukses bang ulun idi keraja deh… nimun iyeh medita’ niat peh, Nimun iyeh mesido. Makai binaweh neh ngenau sala’. Dengan dita’ niat idi mesido iyeh mala amung luk iyeh ngalap ineh hasil usaha tueh burur neh sebuleng. Iamo’, kareb lemulun sinih mesusa’ idi gagal… iyeh pelaba dareh idi meputut rapet. “Ilung neh yenih, lemulun sinih berjaya pana’ na ulek neh. Dat peh lawe neh… na te’ ulek neh!”

Taman tinan kinanak. Yenih tau pelibal terawe tupu. ui iko mepad. Tau inih pudut Allah. Bersyukur idi mawang niat kuh anun luk idi netau. Inan atau na inan ngelatep niat. Amung Ubur Dita idi Rayeh kuan Allah Taman luk bang surga. Amen!

Taman tinan kinanak; Inan peh kareb, Udung lak sinih 2011 (kareb Aco Natal), ngalap cuti. Lemubed tau ngikak bawang, taman, tinan idi kinanak tau luk pangeh mio tican. Nguit peruan luk serigit, dueh rigit idi ribu ribu rigit dih muli. Kongsi peruan idi berkat ineh dengan lun mula’. Peruan kuan muh! Tabi idi Sembayang.

Advertisements

Tinggalkan Jawapan

Masukkan butiran anda dibawah atau klik ikon untuk log masuk akaun:

WordPress.com Logo

Anda sedang menulis komen melalui akaun WordPress.com anda. Log Out / Tukar )

Twitter picture

Anda sedang menulis komen melalui akaun Twitter anda. Log Out / Tukar )

Facebook photo

Anda sedang menulis komen melalui akaun Facebook anda. Log Out / Tukar )

Google+ photo

Anda sedang menulis komen melalui akaun Google+ anda. Log Out / Tukar )

Connecting to %s